2018 சிம்ம ராசி

ஆங்கில வருடப்பிறப்பு ராசிபலன்கள் 2018

சிம்ம ராசி தியாக உணர்வுமிக்க சிம்ம ராசி அன்பர்களே! ராசிக்கு 8ஆம் அதிபதி ராசிக்கு 3ல் நின்று திடீர் யோகத்தை ஏற்படுத்துகிறார். ஆகவே புகழ் பெறுவீர்கள். வித்தியாசமான புதிய முயற்சிகளில் ஈடுபட்டு தனித்திறமையை வெளிப்படுத்துவீர்கள். சிறு தொழில் முயற்சிகள் கைகூடும். பிரபலமான பெரியவர்களின் உதவியால் கண்டுபிடிப்புகள் சார்ந்த முயற்சிகள் கைகூடும். தகவல் தொழில்நுட்பம் சார்ந்த முயற்சி சிறப்பான நற்பெயரை பெற்றுதரும். உங்களின் திறமைக்கு சவாலான சில செயல்களில் ஈடுபடுவதால், உங்களின் திறமை பளிச்சிடும். மனதில் புதிய தன்னம்பிக்கையும், உற்சாகமும் மேலோங்கும். தாய் பற்றிய கவலைகள் அதிகரிக்கும். தாயாரின் நலன் கருதி சில முன் ஏற்பாடான செயல்களில் ஈடுபடுவீர்கள். பழைய சொத்துக்களை விற்று புதிய சொத்து வாங்கும் வாய்ப்புகள் அமையும். இதுவரை ராசிக்கு 4ல் நின்ற சனிபகவான் ஆரோக்கிய குறைபாட்டையும், வாகன பராமரிப்பு செலவுகளையும், சொத்துக்களில் வில்லங்கங்களையும் ஏற்படுத்தி, சங்கடங்களை கொடுத்து வந்தார். இனிமேல் அதுபோன்ற அசுப பலன்கள் மாறி சுப பலன்கள் அனைத்தும் கைகூடும். திருமண யோகம் கைகூடும். திருமண வயதில் உள்ளவர்களுக்கு நல்ல வரன்கள் தேடிவரும். காதலிப்பவர்களுக்கு காதல் கனிந்து பெற்றோரின் ஆதரவுடன் திருமணம் நடைபெறும். சிலருக்கு புதிய காதல் மலரும். வேலைவாய்ப்புகள் அமையும். மருத்துவம் சார்ந்த துறைகளில் உள்ளவர்களுக்கு சிறப்பான முன்னேற்றம் உண்டாகும். நீண்ட காலமாக புத்திர பாக்கியம் எதிர்பார்ப்பவர்களுக்கு புத்திர பாக்கியம் கைகூடும். சில மருத்துவ செலவுகள் செய்ய வேண்டி வரும். வெளியூர் மற்றும் வெளிநாட்டு வேலை வாய்ப்பு தேடுவோருக்கு சிறப்பான தகவல்கள் வந்து சேரும். பிள்ளைகள் வழியில் பெருமைகள் சேரும். எதிர்ப்புகள் மாறும். பகைவரும் பகையை மறந்து உறவாடி மகிழ்வார்கள். கணவன் - மனைவி ஒற்றுமை மேம்படும். கூட்டுத்தொழில் முயற்சிகள் பலிதமாகும். பொதுவாக நண்பர்களின் உதவிகள் சிறப்பாக அமையும். பூர்வீகம் மற்றும் தந்தை வழி சொத்துக்கள் கிடைக்கும். தந்தையின் தொழிலை மேற்கொள்ள நேரிடும். தந்தையின் வழிகாட்டுதலால் புகழின் உச்சியை அடைவீர்கள். தொழில் சிறப்படையும். வியாபார அபிவிருத்தியால் லாபநிலை உயரும். வெளிநாட்டு ஏற்றுமதி, இறக்குமதி சார்ந்த தொழில் புரிபவர்களுக்கு சிறப்பான காலமிது.

ஆரோக்கியம் :

இதுவரை அர்த்தாஷ்டம சனியாக சனிபகவான் சஞ்சாரம் செய்ததினால் உடல் உபாதைகள் அதிகம் ஏற்படுத்தி இருப்பார். இப்போது அனுக்கிரக மூர்த்தியாக சஞ்சாரம் செய்வதினால் ஆரோக்கியம் சீர்பெறும். சித்த மருத்துவம் அல்லது மாற்று மருத்துவம் விரைவில் நோய் பூரண குணமடைய வழிவகுக்கும்.

பொருளாதாரம் :

வியாபார நிலை சிறப்பாக அமையும். தனவரவுகளில் சற்று தாமதமான சூழ்நிலை உருவாகும். பொருளாதார முன்னேற்றம் சிறப்பாக அமையும். தொழிலுக்கு குடும்ப உறுப்பினர்களின் பூரண ஒத்துழைப்பு கிடைக்கும். வீட்டிற்கு தேவையான புதிய பொருட்கள் வாங்கும் வாய்ப்புகள் அமையும். பழைய வீட்டை பராமரிக்க நேரிடும். வரக்கூடிய பொருளாதாரத்தை சேமிப்புகளாக மாற்ற முயலுவீர்கள்.

புகழ் :

தந்தை செய்ய வேண்டிய சில முக்கியமான காரியங்களை தந்தையின் வழிகாட்டுதலோடு செய்து முடிப்பதன் மூலம் பிரபலமடைவீர்கள். வெளிவட்டார புகழ் சிறப்படையும். பகைவரும் நட்பு பாராட்டுவார்கள். ஆன்மீக பணிகளில் ஈடுபட்டு புகழ் பெறுவீர்கள். குலதெய்வ காரியங்களில் பங்கு பெறுவீர்கள். மூத்த சகோதர, சகோதரி வழியில் ஆதரவு பெருகும்.

வரவேண்டிய வரவுகள் :

உங்களுக்கு வரவேண்டிய நியாயமான தொகைகள் உங்களின் இருப்பிடம் தேடி வந்து சேரும். பழைய பாக்கிகள் வசூலாகும்.

வாகனமும், வருமானமும் :

வாகன தொழில் புரிபவர்கள் புதிய சொகுசு வாகனம் வாங்குவார்கள். வாகனத் தொழில் மத்திம நிலையிலேயே இருக்கும். வரவுக்கேற்ற செலவுகள் உண்டாகும். கால்நடைகளுக்கு பராமரிப்பு செலவுகள் அதிகரிக்கும். பூர்வீக சொத்துக்களை பங்கீடு செய்வதன் மூலம் சொத்து சேர்க்கை ஏற்படும்.

உத்தியோகஸ்தர்களுக்கு :

அலுவலக பணியில் உள்ளவர்கள் உயர் அதிகாரிகளால் பாராட்டப்படுவார்கள். தொழில் சார்ந்த அலைச்சல்கள் அதிகரிக்கும். சக ஊழியர்களின் ஒத்துழைப்பு சிறப்பாக அமையும். பொது மக்கள் தொடர்பில் உள்ளவர்களுக்கு புகழ் அதிகரிக்கும்.

அரசியல்வாதிகளுக்கு :

மறைமுக எதிர்ப்புகள் மாறி புகழ் பெறுவீர்கள். பகைவனையும் பேச்சால் வெற்றி பெறுவீர்கள். சமயோகித புத்தியும், பேச்சும் பல வெற்றிகளை ஈட்டித்தரும். அரசியலில் முக்கிய பதவிகள் தேடிவரும். முக்கிய பொறுப்பில் உள்ளவர்களுக்கு மிகவும் நெருக்கம் பெறுவீர்கள். வயதில் மூத்தவர்களின் ஒத்துழைப்பு சிறப்பை தரும். பொது நல சேவையில் ஈடுபடுபவர்களுக்கு மிக அற்புதமான காலமாகும். வருமான வாய்ப்புகள் உங்களை தேடி வரும். வாய்ப்புகளை சரிவர பயன்படுத்துவதன் பொருட்டு முன்னேற்றம் பெறுவீர்கள்.

மாணவர்களுக்கு :

அடிப்படை கல்வி பயிலும் மாணவர்களுக்கு சற்று கவன குறைவுகள் ஏற்படும். உயர்கல்வி பயில்வோர்கள் வகுப்பில் முதலிடம் பெறுவார்கள். தொழிற்கல்வி பயில்வோருக்கு பெரிய கம்பெனிகளில் வேலை வாய்ப்புகள் அமையும். தொழிற்கல்வி பயில்வோர்கள் புதிய சாதனைகள் மற்றும் கண்டுபிடிப்புகளை நிகழ்த்துவார்கள். தலைமையின் ஆதரவு சிறப்பாக இருக்கும். திறமைகளால் முன்னேற்றம் பெறுவீர்கள். விளையாட்டு துறையினர் சாகச செயல்களில் ஈடுபட்டு புதிய சாதனை படைப்பார்கள்.

வியாபாரிகளுக்கு :

புதிய தொழில் முயற்சி கைகூடும். கூட்டுத்தொழிலை விட்டு விலகி சிறு தொழில் தனியாக துவங்க நேரிடும். தொழில் வகை லாபங்கள் சிறப்பாக அமையும். தொழிலில் புதிய யுக்திகளை பயன்படுத்தி வெற்றி காண்பீர்கள். திறமையை முழுமையாக வெளிபடுத்தி வெற்றி பெற வாய்ப்புகளை பயன்படுத்திக் கொள்ளுங்கள். ஆர்டர்கள் நிறைய வரும். தொழில் அபிவிருத்தி உண்டாகும். முதலீட்டை அதிகரிக்க நண்பர்கள் மற்றும் பெரியோர்களின் ஆதரவு கிடைக்கும்.

பெண்களுக்கு :

தந்தையின் உதவியினால் புதிய தொழில் துவங்கும் வாய்ப்புகள் ஏற்படும். இளைய சகோதர, சகோதரிகளின் உதவி கிடைக்கும். பெண்கள் சார்ந்த உடை, அலங்கார பொருட்கள் சார்ந்த தொழில் சிறப்பான பலனை தரும். கணவரின் ஒத்துழைப்பு பூரணமாக கிடைக்கும். பொது சேவையில் ஈடுபடும் பெண்கள் சிறப்பான சாதனைகள் படைத்து புகழ் பெறுவார்கள்.

பரிகாரம் :

அவிநாசிக்கு அருகில் உள்ள திருமுருகன் பூண்டி தலத்தில் உள்ள சிவபெருமானையும், முருகப்பெருமானையும் தீபமேற்றி வழிபட்டு, பின்னர் சிவன் கோயிலுக்கு பின்புறம் உள்ள கேது பகவான் கோவிலுக்கு சென்று, கொள்ளு பரப்பி, தீபமேற்றி, பால் அபிஷேகம் செய்து, தேங்காய், பழம் வைத்து அர்ச்சித்து, அர்ச்சகருக்கு கொள்ளு தானம் செய்வதன் மூலம் சுபபலன்கள் அனைத்தையும் கிடைக்கப் பெறலாம்.

---